ताप्लेजुङमा अनलाइन सेक्युरिटीजको आयोजनामा वित्तीय तथा शेयर बजार सचेतना कार्यक्रम सम्पन्न

ताप्लेजुङ।अनलाइन सेक्युरिटिज लि. ले गत शनिबार ‘ग्लोबल मनी विक २०२३’ को सन्दर्भमा ताप्लेजुङको फुङ्लिङ नगरपलिकामा वित्तीय सचेतनामूलक कार्यक्रम सम्पन्न गरेको छ । 

संस्थाका निवर्तमान अध्यक्ष तथा सञ्चालक दिनेश शर्मा बिडारीको सभापतित्वमा भएको कार्यक्रमको उद्घाटन फुङ्लिङ नगरपालिकाका मेयर अमिर मादेनले ब्यानर पढेर गरेका थिए ।

कार्यक्रममा वित्तीय सचेतना तथा शेयर बजार सम्बन्धी आधारभूत कुराहरुको जानकारी गराइएको थियो । धरान शाखाका प्रमुख सुजन निरौलाले शेयर बजार र यसमा हुने कारोबार  प्रक्रिया , प्राथमिक बजार र दोश्रो बजार, कम्पनी छनोट गर्ने तरिका, अल्पकालीन तथा दीर्घकालीन लगानीका फाइदा तथा बेफाइदा , टिएमएसको प्रभावकारी सञ्चालन , किनबेच पश्चात्को राफसाफ प्रक्रिया, कम्पनीको वित्तीय विवरण  र यसले बजारमा पार्ने प्रभाव, फण्डामेन्टल तथा टेक्निकल एनलाइसिसका कुराहरु बारे प्रस्तुति दिए । 

त्यसैगरि लगानी किन गर्ने , के मा लगानी गर्ने , आफ्नु लगानीमा हुने जोखिम र यो जोखिमलाई कसरी न्यूनीकरण गर्न सकिन्छ साथै लगानी गर्दा ध्यान दिनु पर्ने विषयमा  दिनेश शर्मा बिडारीको प्रस्तुति थियो । 

कार्यक्रममा उद्यमी,व्यवसायी, व्यापारी,शिक्षक, विद्यार्थी ,कर्मचारी तथा सर्वसाधारणसहित कुल १६५ जनाको उपस्थिति रहेको थियो ।

अनलाइन सेक्युरिटिजले ताप्लेजुङमा नै चैत्र ७ गते ३५ जना उद्यमी व्यवसायी माझ पनि विशेष कार्यक्रम आयोजना गरेको थियो । त्यसैगरी चैत्र १० गते श्री भानु जन माविमा कक्षा १२ का ४५ जना बिद्यार्थीहरु माझ कार्यक्रम गरेको थियो । 

संस्थाका तर्फ बाट सुजन निरौलाले  धरान मै रहेर पनि ताप्लेजुङबासीलाई सहज ढंगले ब्रोकरेज सेवा दिन प्रतिबद्धता जाहेर गरे ।