बीओकेको डिबेन्चर आउँदै,बिक्री प्रबन्धकको रुपमा एनआईबिएल एस क्यापिटल नियुक्त

काठमाण्डौ।बैंक अफ काठमाण्डू लिमिटेडले रु.१ हजार अंकित दरको ११ लाख कित्ताले हुन आउने रु.१ अर्ब १० करोड रकम बराबरको बीओके डिबेन्चर २०८६ (क), ऋणपत्र जारी गर्न एनआईबिएल एस क्यापिटल लिमिटेडलाई बिक्री प्रबन्धकको रुपमा नियुक्त गरेको छ । 

उक्त सम्झौतामा बैंक अफ काठमाण्डू लिमिटेडको तर्फबाट प्रमुख कार्यकारी अधिकृत श्रवण लाल मास्के र एनआईबिएल एस क्यापिटल लिमिटेडको तर्फबाट नायब महाप्रबन्धक सचिन्द्र ढुङ्गानाले आज बुधबार हस्ताक्षर गरे ।

उक्त ऋणपत्रको अवधि ७ वर्ष रहेको र ब्याजदर १०.५० प्रतिशत रहेको छ । 

काठमाण्डौें, कमलपोखरीस्थित मुख्य कार्यालय रहेका बैंक अफ काठमाण्डू लिमिटेड कम्पनी ऐन बमोजिम नेपाल सरकार, कम्पनी रजिष्ट्रारको कार्यालयमा पब्लिक लिमिटेड कम्पनीको रुपमा दर्ता भएको हो । यस बैंकले तत्कालीन बैंक अफ काठमाण्डू लिमिटेड तथा लुम्बिनी बैंक लिमिटेड एक आपसमा गाभिई बैंक तथा वित्तीय संस्था सम्बन्धी ऐन, २०७३ अनुसार २०७३/०३/२४ गते नेपाल राष्ट्र बैंकबाट वित्तीय कारोवार गर्न स्वीकृति प्राप्त गरी “क” वर्गको वित्तीय संस्थाको हैसियतले बैंकिङ्ग कारोवार सञ्चालन गर्दै आएको छ ।

बैंकले ९९ शाखा, ८७ एटीएम र १० एक्सटेन्सन काउन्टरमार्फत ग्राहकहरुलाई उत्कृष्ट सेवा प्रदान गरिरहेको जनाएकोछ ।